Parsonaji de One Piece

'Sta chive ła ze na łista parsiałe de i parsonaji che i conpare sol manga One Piece scrito e dizenjà da Eiichirō Oda.

Par savèrghene de pì, vardarse anca ła voze Ciurma del Capeło de Paja.

I Pirati Jolly Roger (ジョリロジャー海賊団 Rojā Kaizoku-dan) jera el nome de ła ciurma capitanada da Gol D. Roger, el Re de i Pirati, e donca ła ciurma pì forte che ghe ze stà pa' i mari parché ła ze stà l'ùnega bona de sircumnavegar tuta ła Łinea Granda par intiero e donca catar el tezoro One Piece. Par de pì, co 'sta inpreza, i Pirati Jolly Roger i ze venjesti a conosensa de łe informasion strainportanti par cuanto che revarda i misteri de ła storia del mondo che ła ze tenjesta sconta dal Goerno Mondiałe. L'autor Oda, fin deso, no'l ga mai revełà i vałori de łe reconpense che łe pendéa sol cao de i menbri de ła ciurma. Ła nave de 'sta ciurma ła jera ła Oro Jackson, costruìa a Water Seven col łenjo del Àlbaro Tezoro de Adamo cofà ła Thousand Sunny de i Mugiwara.

Par savèrghene de pì, vardarse anca ła voze Gol D. Roger.

Silvers Rayleigh (シルバーズ・レイリー Shirubāzu Reirī), soranominà el Re Scuro, el ze stà el capitan vicario de ła ciurma de i Pirati Jolly Roger e fursi el mejo amigo de Gol D. Roger. Ło vedemo dizenjà da zòvane inte el flashback indóe che A se vede Roger che el mete su ła ciurma. Rayleigh, inte el prezente del tenpo naradivo del manga, el ze un vecio de 76 ani che el vive inte el arsipełago Sabàody inte ła Łinea Granda. In chel contesto el vive sote falsa identità, parché el ze ancura resercà da ła Marina, fazendo el mistier de revestidor de navi. E de fati el sarà purpio łu a revestir la Thousand Sunny de i Mugiwara vanti che i partise pa' l'ìzoła sotomarina de i Òmeni Pese. El só contributo, par el prosedar de l'aventura de i Capel de Paja, el ze strafondamentałe parché łi jutarà a no èsar copài da Kizaru, el Capitan da Mar de ła Marina, e el sarà njente manco che l'istrutor e méntore de Luffy durando i du ani de arlenamento. Ze purpio grasie a i insenjaminti del Re Scuro che Luffy el inpararà el dòparo de l'Anbision. Da'l ponto de vista del aspeto el ze un omo alto e muscołozo, co ła barba e co łonghi cavéi cołor de l'arzento, un parsonajo che el emana al isteso tenpo un carizma grando ma anca na sensasion de calma e saviesa. Via de tut pararìa che łe só pasion pì grande łe fuse el zogo de azardo, łe bełe fémane e béar alcol. Ła reconpensa sora el só cao ła ze al momento mìa conosùa.

Oltra che Roger e Rayleigh A conosemo anca altri menbri de i Pirati Jolly Roger e, tra de 'sti chive, ghe ne ze calcun de inportansa granda inte el zviłupo naradivo de One Piece, tamentre ghe ne ze altri che de coełi conosemo solche el nome:

• Crocus (クロッカス Kurokkasu) el ze stà el mèdego de bordo de ła ciurma de i Pirati Jolly Roger inte i cuatro ani che i ghe ga metesto pa' parcorar tuta ła Łinea Granda. El ze stà recrutà inte ła Ponta de i Zemełi, pena zo de ła Reverse Mountain, parché Roger el gavéa capìo de ver un bruto mal incuràbiłe e donda Crocus el ze stà bon de farghe fenir ła mision. Inte el manga ło catemo pa' ła prima volta da vecio a far el vardian de ła Ponta de i Zemełi, inte łi capìtułi indóe che i Mugiwara i ze boni de entrar inte ła Łinea Granda. E de fati el ze stà purpio Crocus a spiegarghe a Nami come che funsiona ła navigasion inte ła Łinea Granda col dòparo del log pose. El vive łive in conpanjìa de ła bałena zigantesca de nome Lovoon che ła ghe ze stà łasada da i pirati Rumbar che de coełi fazéa parte Brook, de fati anca el sonador de i Capel de Paja el se recorda ben de 'sto parsonajo. El só nome el deriva da łe piante del zènare Crocus;
• Shanks e '''Buggy''': a i tinpi de łe aventure co Roger i jera du boce recrutài cofà novisi inte ła nave Oro Jackson. In calche siena de flashback A ze posìbiłe védarli intanto che i zbarufa par via de monàe e ze 'sta purpio pa' na senpiada de Shanks che Buggy el ga manjà invołontariamente el Fruto del Diàoło. A'l momento atuałe de ła narasion savemo che Shanks el ze deventà un de i Cuatro Inperadori tamentre Buggy, daspò de èsar stà brincà da ła Marina, el ze deventà un de i Sete Corsari;
• Scopper Gaban e Seagull: in ze du parsonaji che i vien mostrài e nominài solche inte el "Capitoło 0", rento el vołume ''One Piece Blue Deep'', a dir na edision spesiałe del manga;
• Kozuki Oden (光月おでん Kōzuki Oden) el jera un retor inportante de na sità del renjo de l'ìzoła de Wano inte el Mondo Novo. Visto che el fazéa parte del clan de i Kozuki e łora łu el conoséa el segreto de fabregasion de i Poneglyph e par 'sto motivo el se ga inbarcà inte ła ciurma e el ga conpanjà Roger fin a l'ìzoła finałe de Raftel. Insebre co łu A ghe jera du zóvani novisi, a dir Inuarashi e Nekomamushi, che daspò i deventarà retori de ła tribù de i Vizoni inte el ìzoła de Zou.

Par savèrghene de pì, vardarse anca ła voze Cuatro Inperadori.

• One Piece
• Monkey D. Luffy
• Ciurma del Capel de Paja
• Glosaro de One Piece
• Jeografìa de One Piece
• Eiichirō Oda